NNXX solicitará ao conselleiro delegado de Twitter a súa versión en galego e comprométese a colaborar na tradución

·      Javier Dorado cre que sería unha forma moi útil de promover a lingua galega entre os usuarios dunha das redes sociais máis coñecidas e utilizadas do mundo

·      Asegura que o compromiso de NNXX coa lingua galega é o que move a esta organización a interesarse por que Twitter abra o seu centro de traducións tamén ao galego

-Novas Xeracións de Galicia solicitará ao conselleiro delegado de Twitter, Dick Costolo, a versión en galego desta coñecida rede social e comprométese a colaborar na súa tradución.

Segundo o presidente da organización xuvenil, Javier Dorado, Novas Xeracións realizará esta petición a través dunha misiva na que non só pedirá que se abra o centro de traducións de Twitter ao galego, senón que tamén ofrecerá a axuda dos mozos e mozas da formación para lograr este obxectivo.

Tras coñecerse que a partir do vindeiro 5 de xullo Twitter dispoñerá dunha versión en euskera e catalán, Novas Xeracións considera que non debe destacar pola súa ausencia nesta rede social a outra lingua oficial de España, que é a galega.

Para Javier Dorado, que os internautas poidan dispoñer do Twitter en galego sería unha forma moi útil de promover a nosa lingua entre os usuarios dunha das redes sociais máis coñecidas e utilizadas do mundo.

Nesta liña, asegura que o compromiso de Novas Xeracións coa lingua galega é o que move a esta organización a interesarse por que non se quede atrás e Twitter abra os seu centro de traducións tamén neste idioma.