REDUCIÓN DEPUTADOS

É unha medida que entronca co programa de austeridade que o presidente Feijóo desenvolveu desde que chegou á Xunta. Hoxe hai menos altos cargos, menos consellerías, menos persoal asesor e de gabinete, e unhas retribucións moito máis modestas que fai tres anos (Feijóo -22%, conselleiros -17%, altos cargos -15%). A cidadanía segue reclamando sacrificios á clase política, e entendemos razoable que se reduza o número de deputados dentro da marxe que establece o Estatuto.

O PSOE xa avalou un Parlamento de 61 deputados ao votar a favor do Estatuto. Se agora quere desdecirse, instámoslle a que presente unha reforma exprés do Estatuto para emendar a súa postura de fai trinta anos.

Especular co resultado dunhas eleccións é un exercicio de ciencia ficción. Ninguén sabe qué van decidir os cidadáns, con independencia de que se elixan 75 ou 61 deputados. O único claro é que o PP é e seguirá sendo o primeiro partido de Galicia, como demostraron todas as eleccións desde 1989. Iso é o que realmente molesta á oposición.

Quen falan de “fraudes electorais” só están a poñer escusas para xustificar o seu desastre interno, a súa incapacidade para ser alternativa e os seus previsibles fracasos. Non se lle pode dar as costas a esta demanda da sociedade.

Unha vez máis, Galicia é pioneira. Estamos convencidos de que este paso o darán outras autonomías nos próximos anos, e non sería descartable que o Estado fixese o propio.

Galicia non se acollerá á liña de financiamento aberta polo Estado para as autonomías porque non o necesita. Ata o momento, colocou as súas emisións de débeda sen problema nos mercados, ao interese máis baixo posible, e cunha notable aceptación por parte dos investidores. Esta é a consecuencia de ser unha comunidade solvente, que paga o que debe e non gasta o que non ten.

O autogoberno permitiu a Galicia anticipar reformas e medidas que lle situaron nesta posición de vantaxe respecto doutros territorios. O autogoberno non é convocar referendums soberanistas nin botarlle pulsos ao Goberno de España, senón xestionar Galicia para que a calidade de vida dos galegos sexa a mellor.

Os galegos debemos estar satisfeitos porque os nosos esforzos colectivos están a ter resultados evidentes. Galicia non necesita realizar axustes severos no seu estado do benestar como están a facer outras autonomías aguilloadas polo déficit. A xestión do presidente Feijóo fixo de Galicia unha comunidade líder.