Rueda ensalza a unidade arredor de Feijóo fronte á división de nacionalistas e socialistas

O secretario xeral cre que España non debe estar seis meses pendente de dous procesos electorais, polo que a decisión de Feijóo é xenerosa e leal con Galicia e co conxunto de España

Rueda ensalza a unidade arredor de Feijóo fronte a socialistas e nacionalistas que non queren a Vázquez e Jorquera de candidatos 

• Celebra que Jorquera e Vázquez estean satisfeitos coa data da convocatoria e agarda que sexa porque lles convencen os argumentos esgrimidos por Feijóo e non polos seus propios intereses dentro de cadanseu partido 

O secretario xeral do PPdeG, Alfonso Rueda, ensalzou hoxe a unidade arredor de Feijóo fronte a socialistas e nacionalistas que non queren a Vázquez e Jorquera de candidatos. 

Trala reunión extraordinaria do Comité de Dirección do PPdeG celebrada esta mañá para que o presidente explicase ao partido os motivos polos que convocar eleccións o 21 de outubro, Rueda fixo fincapé en que as razóns son básicamente de responsabilidade. 

Así, apuntou que se trata dunha cuestión de responsabilidade económica, para que o goberno que aprobe os orzamentos de 2013 teña catro anos por diante e non estea a piques de estar en funcións; de responsabilidade política, para facilitar a unidade entre os distintos partidos que a incertidume sempre empaña; e institucional, ao facer coincidir as eleccións galegas coas vascas e non acaparar con dúas convocatorias electorais diferentes a atención dun país que debe estar centrado na economía. 

Segundo Rueda, a España das autonomías non debe estar seis meses pendente de aprobación de listas, de escrutinios e de constitucións gobernamentais, polo que a decisión de Feijóo é xenerosa e leal con Galicia e co conxunto de España e supón renunciar a 130 días de lexislatura para darlle a España 720 días sen eleccións. 

Por outra banda, o dirixente popular indicou que todo o PPdeG quere a Feijóo como cabeza de cartel pero fixo fincapé en que esta unión non existe no PSOE e no BNG, xa que non están plenamente satisfeitos co seu candidato.

 Así, apuntou que non todos os nacionalistas queren que Jorquera sexa o candidato, por iso o BNG ten sufrido importantes baixas internas. En canto ao PSOE, afirmou que non todo o PSOE apoiaría a Vázquez como candidato xa que, de chegar a selo, será por ter aforrado o trago de enfrontarse a unhas primarias. 

En calquera caso, o dirixente popular celebrou que tanto Jorquera como Vázquez estean satisfeitos coa convocatoria electoral e agarda que sexa porque lles convencen os argumentos esgrimidos por Feijóo e non polos seus propios intereses dentro de cadanseu partido. 

Nesta liña, Rueda fixo fincapé en que quen non é capaz de poñer orde no seu propio partido non pode aspirar a gobernar unha comunidade.