REFORMA LABORAL

É un documento necesario e valente, aprobado o venres por un Goberno decidido a combater a taxa de cinco millóns de desempregados que herdou do PSOE. Flexibiliza un ríxido mercado laboral no que non había marxe para que as empresas cren emprego, estimula a autónomos e pemes para contratar ao primeiro traballador, incentiva os contratos a mozos, fomenta a recolocación de traballadores que sufran un ERE, combate a fraude e a economía mergullada ou consolida a formación. É a reforma que España necesita para crear emprego no momento que a economía despegue de novo.

O PSOE non está lexitimado a criticar esta reforma laboral, despois de fracasar na que impuxo hai dous anos unilateralmente, e que se saldou cun millón máis de parados. A inercia do mercado laboral encamiñábase ao desastre, un caos froito da nefasta xestión socialista que o PP e Mariano Rajoy tentan atallar con esta reforma. Quen conduciu a España ao maior desemprego da súa historia non pode criticar nada, e iso é extensible a Pachi Vázquez e o PSOE galego.

O Goberno trasladará hoxe aos sindicatos o contido da reforma, para tentar alcanzar puntos de acordo e evitar tensións sociais que repercutirían na marcha da economía. En calquera caso, fronte a un PSOE que non atopou nin un só apoio para a súa fracasada reforma, o PP está seguro de que outros partidos entenderán a necesidade desta nova normativa, e así a apoiarán no Congreso.