REFORMA SANITARIA

Os populares galegos apoiamos a opinión do presidente Feijóo acerca da sanidade: mentres se garanta que a atención sanitaria é pública, gratuita e universal, é un debate secundario quen xestione a limpeza dos hospitais, a compra de materiais ou as cafeterías. Os poderes públicos deben velar por que a esencia do sistema sanitario sexa público, ao mesmo tempo que inciden na mellora da súa eficiencia.

A cesión a terceiros de servizos non sanitarios alleos á atención aos pacientes non é, en ningún caso, a privatización dun hospital. Porque o cidadán segue sendo atendido polo seu médico, segue sendo curado por un enfermeiro, segue sendo operado polo cirurxián, sen que iso lle custe un euro máis. Isto desmonta a pantasma da privatización que tanto proclama o PSOE.

Outra cuestión é que se proceda a un concerto con determinadas empresas para dar cobertura a unha área de poboación que necesita atención médica de forma inmediata. Para unha administración, é máis rápido e máis áxil acordar cun hospital ou un centro de saúde privado que construír un e poñelo a funcionar. Cando os cidadáns precisan atención, o primeiro é dar resposta á necesidade no menor tempo posible. Esta é a fórmula que se empregou en Vigo con Povisa, ata que entre en funcionamento o novo hospital.

Nestes casos, os poderes públicos deben realizar unha labor de vixilancia e auditoría, xa que a atención sanitaria que se presta ao cidadán debe ser sempre de calidade.