SITUACIÓN ECONÓMICA - RESCATE BANCA

O Goberno de España, xunto á Comisión Europea, defenden que hai que desligar na medida do posible o rescate á banca da débeda do país. A situación económica do Estado nada ten que ver coa axuda financeira que poida recibir un sector minoritario da banca española. Este é un debate a curto prazo, enmarcado noutro a medio prazo sobre a unión fiscal e bancaria dentro da zona euro.

Desligar estes dous asuntos xeraría confianza nos mercados e restaría incerteza á solvencia de España, que cremos que está fóra de toda dúbida. Así se entende que en cada emisión de débeda pública, a demanda sexa sempre moi superior á oferta. A pesar das trabas das axencias de rating, os investidores seguen confiando na débeda española.

Rescate bancos

As auditorías independentes á banca española arroxan datos esperanzadores para o sector financeiro. Nun escenario normal, necesitarían entre 17.000 e 25.000 millóns de euros para recapitalizarse; nun escenario moi extremo, con apenas un 1% de probabilidade de darse, 65.000 millóns. Por tanto, moi lonxe dos 100.000 millóns habilitados pola UE.

Ademais, as auditoras confirman que os grandes grupos bancarios españois (Caixa, Santander, BBVA) non necesitarían acollerse a este crédito para recapitalizarse, e outro grupo intermedio (Sabadell, Popular, bancos medianos) só o farían de darse o escenario extremo máis improbable. Así, son só tres entidades (Bankia, Cataluña Caixa e NCG) as que necesitarían esta axuda.

Reiteramos que isto non significa a quebra de ningún banco, escenario que o Estado non contempla en ningún caso. Isto é o resultado de garantir provisións financeiras para produtos inmobiliarios e mesmo créditos sans no sector bancario para facer fronte a eventuais caídas da economía. Esta reforma financeira garantirá aínda máis a solvencia da banca española.

España fixo os seus deberes, como está a ocorrer desde que Mariano Rajoy é presidente. Agora corresponde ao BCE e o FMI detallar as condicións desta axuda financeira. Entre todos debemos contribuír a xerar confianza entre uns mercados que seguen crendo en España, como demostrou onte a emisión do Tesouro, coa demanda triplicando a oferta.