PENSIÓNS NGB

O Banco de España bloqueou o pago de pensións aos ex directivos da caixa galega, por entender que existe un déficit de solvencia na entidade. É unha medida que o presidente Feijóo solicitou por carta hai un ano á entidade supervisora do sector financeiro nacional. MAFO non moveu un dedo, e foi o seu sucesor, Luis Linde, quen adoptou a decisión.

Foi un Goberno do PP o que limitou as indemnizacións para os directivos dos bancos intervidos polo Estado ou beneficiarios de fondos públicos. E aqueles que sexan sancionados pola súa mala xestión non percibirán un euro. Non se pode premiar con indemnizacións millonarias aos xestores dunhas caixas nas que faltou transparencia e rigor durante os últimos anos. Desa mala xestión derivan os actuais problemas de NGB.

Queda en evidencia a oposición, que reclamaba á Xunta a toma desta decisión. Como quedou demostrado, as competencias para limitar ou rexeitar indemnizacións dos directivos de entidades financeiras que recibiron fondos públicos son exclusivas do Banco de España.