CONTROL DO DÉFICIT

Galicia foi, é e será a comunidade autónoma que mellor cumpriu co obxectivo anual de déficit no últimos tres anos e coas contas públicas máis saneadas de España. O compromiso coa estabilidade orzamentaria é total, e demostramos que se pode ser leal co Estado blindando os servizos públicos esenciais.

No entanto, a Xunta considera que o Goberno podía propoñer obxectivos de déficit máis flexibles para os próximos dous anos, á vista de que Europa deu un ano máis de marxe a España. Ou polo menos, recoñecer a aquelas autonomías que foron responsables fronte a aquelas outras que non o foron tanto. Por iso é polo que se valorase a abstención na votación do Consello de Política Fiscal e Financeira.

Nun momento no que se require xerar confianza, Galicia será unha vez máis leal co Estado, e por iso deu o seu voto afirmativo a este proxecto de consolidación fiscal. Un “si crítico”, porque sacar a España do pozo é un exercicio colectivo, é unha tarefa de todos, mesmo cando haxa cousas que non nos gusten ao 100%. A redución de catro décimas para 2013 pode amortecerse coas subidas tributarias. Do que estamos convencidos é de que Galicia cumprirá o 1,5% este ano, e co 0,7% o que vén.

Que Galicia é unha comunidade solvente e que xera confianza entre os investidores non o di o presidente da Xunta, senón as axencias de cualificación e os mercados. Moody's recoñeceu que Galicia merecería mellor cualificación que España (non pode porque o seu tope é o do Estado), e a débeda autonómica colócase ao interese máis baixo posible. En Galicia están a facerse as cousas ben.