CRISE PSOE

Novo desprezo á autoridade de Pachi Vázquez no PSdeG. Carmela Silva non se vai do Concello e manterá a duplicidade de cargos, en contra da doutrina do líder socialista. Caballero sáltase a Pachi e negociará directamente con Rubalcaba. O alcalde de Vigo rompe así o acordo previo de que Silva renunciaría á acta de concelleira cando se aprobasen os Orzamentos municipais.

Pachi é incapaz de facer cumprir as normas que el mesmo aproba no partido. É un líder cada día máis irrelevante. A máxima “unha persoa, un cargo” foi a súa única achega ao socialismo galego cando se presentou ao congreso de Pontevedra en 2009. Pero só a aplicou para purgar do Parlamento aos deputados que lle facían sombra, como Barcón e Leiceaga. Caballero búrlase do secretario xeral do PSdeG e incumpre as directivas internas.

Mentres os socialistas deberían estar a expor alternativas e propostas para saír da crise, o seu único debate é se Carmela Silva debe acumular cargos ou non. Cada día que pasa queda evidenciado que o mandato de Pachi Vázquez estivo caracterizado exclusivamente pola pelexa continua. Aínda que é entendible que non presente alternativas, porque para falar de economía ten que reunirse con profesores de universidade e prescindir dos seus deputados nesta área.