CATALUÑA

Recomendamos a Artur Mas que en lugar de buscar culpables noutras autonomías para a quebra da súa economía se aplique para cumprir o obxectivo de déficit para este ano, despois de que Cataluña non o fixese nos últimos exercicios. Entendemos que é máis fácil atacar a Galicia que recoñecer a verdade, pero así non se lle dan solucións aos seus cidadáns.

Cataluña foi a comunidade que impuxo en 2009 o novo modelo de financiamento autonómico, do que sae extraordinariamente beneficiada, amén do compromiso de investimentos de Fomento que arrincou a Zapatero. Galicia saíu prexudicada daquel sistema. Tres anos despois, Cataluña está ao bordo da quebra e Galicia é a autonomía máis solvente de España.

Todo iso, a pesar de que Cataluña fai máis de cinco anos que ten AVE para conectarse coa Meseta, que non está nunha situación de illamento xeográfico que lle impide internacionalizar plenamente a súa economía, e que non ten un problema endémico de dispersión e envellecemento poboacional.

Hoxe Galicia pode darlle leccións a Cataluña, por exemplo de como non pechar hospitais, de como non cobrar diñeiro extra por receita ou de como non baixarlle o soldo aos seus funcionarios.