MEDIDAS FUNCIONARIOS

Os populares reiteramos que son medidas excepcionais, temporais pero sobre todo necesarias para manter a estabilidade orzamentaria e garantir a sustentabilidade dos servizos públicos. Sabemos que son impopulares, pero entendemos que os esforzos nesta crise non teñen que recaer sempre nos mesmos, nos máis de cinco millóns de parados, senón que deben distribuírse entre todos.

Gustaríanos que houbese unha maior sensibilidade para coas vítimas reais desta crise por parte dos sindicatos, que en todo este proceso, preferiron a pancarta e a protesta á presentación de alternativas.

Queremos lembrar que, ao contrario que outras autonomías, non se lles vai a baixar o soldo aos funcionarios da Xunta, senón que se van a limitar temporalmente unha serie de complementos e beneficios dos que gozaban ata agora. O PSOE non está lexitimado para criticar estas medidas despois de que Zapatero rebaixase o 5% do salario dos empregados públicos.

Este Plan só baixa o salario aos altos cargos da Xunta que deixarán de cobrar o plus aprobado polo bipartito, e os directivos das empresas públicas.

A Xunta tomou, toma e tomará sempre decisións polo interese xeral de Galicia, co obxectivo primordial de blindar as prestacións sociais e cumprir cos seus obxectivos de estabilidade orzamentaria, que son os que permiten financiarse a un menor interese.