SITUACIÓN DO BNG

O BNG pasou de ser unha formación cun discurso propio a mero escudeiro do PSOE, que o apoia alí onde o PP gañou as eleccións pero non ten maioría absoluta a cambio dun puñado de euros en forma de dedicación exclusiva, por exemplo ocorre en Vigo. Non é lóxico que os nacionalistas lle dean carta branca ao peor alcalde que tivo a cidade máis poboada de Galicia a cambio de dous soldos. O BNG ampara o localismo, o personalismo e a demagoxia a cambio de dúas dedicacións.

Os galegos deben saber en que consisten estes pactos de perdedores. Xa o viron co bipartito, e hoxe seguen asistindo a espectáculos como o de Vigo. Un alcalde que minte no tema da fusión das caixas, que pon obstáculos ao maior investimento hospitalario da historia recente de Galicia, que resucitou un discurso caduco de confrontación entre cidades, e que con todo ten carta branca do nacionalismo.

Fronte a partidos sen proxecto, fronte a arranxos monetarios, fronte a cambalaches en forma de soldos e dedicacións, o PP representa un proxecto sólido, unido, solvente e coherente, que non di unha cousa en cada sitio e que está comprometido coa cidadanía. Ao PP non se lle compra con dedicacións exclusivas. Vemos que outros partidos non poden dicir o mesmo.