TARXETA SANITARIA

Galicia é a única comunidade que garante de oficio a asistencia sanitaria a desempregados de longa duración e persoas sen recursos. Coa publicación en setembro da Orde da Consellería de Sanidade, Galicia anticípase 4 meses a unha medida do Goberno de España para garantir a asistencia sanitaria a estes dous colectivos.

A orde publicada polo Goberno galego beneficia aos parados que teñan esgotada a súa prestación de desemprego, así como aos que a Seguridade Social lles retirara a prestación sanitaria.

A oposición continúa mentindo sobre a sanidade pública en Galicia, cortando frases e sesgando textos oficiais, algo que atenta contra o rigor. Só teñen que presentar documentación para acceder a unha tarxeta do Servizo Galego de Saúde as persoas procedentes de fora de España que se declaren sen recursos e que non tiveran tarxeta sanitaria con anterioridade, por exemplo, os estranxeiros que non acrediten residencia oficial aquí.

Alerta dunha falsa circular nas redes sociais

O Sergas non emitiu ningunha “Circular informativa sobre a cobertura sanitaria”, na que se verten unha serie de aseveracións completamente falsas, sobre a medida posta en marcha polo Goberno galego, mediante a que se actualiza o procedemento para o recoñecemento do dereito á asistencia sanitaria por parte das persoas sen recursos económicos suficientes e daquelas que se encontran en situación de desemprego.

Cómo xa se reiterou en múltiples ocasións, ningún galego terá obriga de firmar ningún compromiso de pago para acceder á asistencia sanitaria.

Deste xeito, ao igual que no resto dos servizos sanitarios de España, as únicas persoas que teñen a obriga de acreditar un compromiso de pago serán exclusivamente as persoas que queiran ser atendidas no Sergas cando teñan a cobertura realizada por mutuas particulares ou os estranxeiros que non acrediten dereito á súa atención sanitaria coa Tarxeta Europea ou documento acreditativo preceptivo.

Ningunha persoa sen recursos quedará sen asistencia sanitaria en Galicia, e que todas as persoas sen recursos terán dereito a asistencia sanitaria.

Lei de Saúde

O Goberno galego vai adoptar cantas medidas considere oportunas, como xa se fixo en política farmacéutica, para garantir a protección da sanidade pública e o uso responsable dos servizos sanitarios.

Respecto ao decreto da Consellería de Sanidade polo que se establecen as tarifas dos servizos sanitarios prestados nos centros dependentes do Servizo Galego de Saúde e nas fundacións públicas sanitarias, lembramos que se trata dunha normativa que sae publicada anualmente e que este ano inclúe como novidade unha disposición adicional que permite á Consellería a aplicación de varios puntos do artigo 15 da Lei de Saúde de Galicia.

Trátase da aplicación dunha lei aprobada polo anterior Goberno bipartito da Xunta. Por tanto, o que para os socialistas é intentar introducir o copago pola porta de atrás ou un mal uso da sanidade pública, limítase a incorporar ao decreto catro puntos dos recollidos no artigo 15 da citada Lei de Saúde de Galicia aprobada en 2008, que se centran nos deberes e obrigas individuais por parte dos usuarios do Sistema Público de Saúde de Galicia.

Son os puntos 4, 5, 10 e 11 do citado artigo 15, que recollen, por recomendación da asesoría xurídica da Xunta de Galicia, a obriga e deberes dos cidadáns a usar axeitadamente os recursos, os servizos e as prestacións ofrecidas polo sistema sanitario; manter a debida observancia das normas establecidas en cada centro; cumprir as normas e os procedementos de uso e acceso aos dereitos que se lle outorguen a través da Lei de Saúde de Galicia; ou comunicarlle ao sistema sanitario, coa maior brevidade posible, a non utilización por calquera causa dun servizo programado previamente.

Iso é o que entenden os socialistas por introducir o copago na sanidade pública galega, unha mostra máis da súa falta de escrúpulos para terxiversar calquera cuestión que caia nas súas mans co fin de conseguir un mínimo rédito político.